URUKIKO MPANABYAHA MPUZAMAHANGA RWASHYIRIWEHO U RWANDA MURI MAKE

Ubwa mbere mu mateka, urukiko mpuzamahanga, by’umwihariko Urukiko Mpanabyaha Mpuzamahanga Rwashyiriweho u Rwanda (TPIR), rwaciriye imanza abantu bakekwaho kuba barakoze icyaha cya jenoside. TPIR yabaye kandi urwego rwa mbere rwemeye ko gusambanya ku gahato ari bumwe mu buryo bwo gukora jenoside.

Iburanisha mu rubanza rwitiriwe Butare

Abaregwa mu rubanza rwitiriwe "urw' Abasirikare rwa mbere" - Bagosora na bagenzi be

• Urubuga rwa interineti rwa TPIR
• Urubuga rwa interineti rwa IRMCT
• Kwibuka20 – Igikorwa cyo kwibuka mu Rwanda
• Gahunda y’Umuryango w’Abibumbye yo gutanga amakuru kuri jenoside yo mu Rwanda

Inama y’Umuryango w’Abibumbye Ishinzwe Amahoro kui Isi yashyizeho Urukiko Mpanabyaha Mpuzamahanga Rwashyiriweho u Rwanda (TPIR cyangwa Urukiko) kugira ngo "rucire imanza abantu bakekwaho kuba barakoreye mu Rwanda no mu bihugu bituranye na rwo ibikorwa bya jenoside n’ibindi bikorwa binyuranyije bikomeye n’Amategeko mpuzamahanga arengera abantu mu gihe cy’intambara hagati y’itariki ya 1 Mutarama n’iya 31 Ukuboza 1994". Urukiko rufite icyicaro Arusha muri Tanzaniya rukanagira ibiro i Kigali mu Rwanda.  Urugereko rwarwo rw’Ubujurire  rufite icyicaro i Lahe [La Haye] mu Buholandi.

Kuva Urukiko rwatangira imirimo yarwo mu mwaka wa 1995, rwakoze Inyandiko z’ibirego z’ abantu 93 rwabonaga ko bagize uruhare mu bikorwa binyuranyije bikomeye n’Amategeko mpuzamahanga arengera abantu mu gihe cy’intambara byakorewe mu Rwanda mu mwaka wa 1994. Muri abo bakorewe Inyandiko z’ibirego harimo abayobozi bakuru bo mu nzego za gisirikare n’iza guverinoma, abanyapolitiki, abacuruzi, abayobozi b’amadini, ab’imitwe yitwaraga gisirikare n’abo mu nzego z’itangazamakuru.

Urukiko rufatanyije n’izindi nkiko mpuzamahanga rwafashe iya mbere mu gushyiraho ubucamanza mpanabyaha mpuzamahanga bwizewe kandi rwafashe ibyemezo byinshi byabaye ubukemuramanza mu birebana na jenoside, ibyaha byibasiye inyokomuntu, ibyaha by’intambara ndetse no ku birebana n’imiterere y’uburyozwacyaha bw’umuntu nka gatozi n’uburyozwacyaha bw’umuntu ukuriye abandi.

TPIR ni rwo rukiko mpuzamahanga rwa mbere mu mateka rwaciye imanza zifitanye isano na jenoside rukaba kandi n’urwa mbere rwagaragaje uko abantu bagomba kumva igisobanuro cya jenoside gikubiye mu Masezerano Mpuzamahanga y’i Jeneve yo mu mwaka wa 1948. Ni na rwo rukiko mpuzamahanga rwa mbere rwatanze igisobanuro cy’icyaha cyo gusambanya ku gahato mu mategeko mpanabyaha mpuzamahanga kandi rwemeye ko gusambanya ku gahato ari bumwe mu buryo bwo gukora jenoside.

Indi ntambwe ikomeye yatewe mu rubanza rwitiriwe itangazamakuru, ubwo TPIR yabaga urukiko mpuzamahanga rwa mbere ruhamije abanyamakuru icyaha cyo gutangaza amakuru agamije gushishikariza abaturage gukora ibikorwa bya jenoside.

TPIR  yaciye urubanza rwa nyuma mu Rugereko rwa Mbere rw’Iremezo ku itariki ya 20 Ukuboza 2012, ari rwo rwa Ngirabatware. Ibi bivuga ko imirimo y’Urukiko ifitanye isano n’ica ry’imanza isigaye gusa mu Rugereko rw’Ubujurire. Muri uku kwezi kwa Mata 2014, Urugereko rw’Ubujurire rwa TPIR ruracyasuzuma imanza 5 zikubiyemo ubujurire 17 butandukanye. Hari urundi rubanza rwaciwe n’Urugereko rwa Mbere rw’Iremezo rwajuririwe mu Rugereko rw’Ubujurire rw’Urwego Mpanabyaha Mpuzamahanga Rwashyiriweho kurangiza imirimo y’Inkiko Mpanabyaha Mpuzamahanga (Urwego cyangwa MICT). Urwo Rwego rwatangiye gukora imirimo TPIR yari isigaje ku itariki ya 1 Nyakanga 2012.

Umurimo w’ingenzi ukorwa n’Urwego mu yo TPIR yari isigaje gukora ni ugushakisha no gufata abantu 3 batarafatwa ngo bashyikirizwe ubucamanza. TPIR yateguye Inyandiko z’ibirego za Félicien Kabuga, Protais Mpiranya na Augustin Bizimana bakurikiranweho jenoside n’ibyaha byibasiye inyokomuntu ariko ubu bakaba batarafatwa. Ubufatanye buhoraho na guverinoma z’ibihugu n’umuryango mpuzamahanga muri rusange bufite uruhare runini mu ifatwa ry’aba bantu. Nibaramuka bafashwe Urwego ruzababuranisha kandi rugenzure uko ibihano byose bashobora gukatirwa birangizwa kimwe n’ibindi bihano byose byatanzwe na TPIR mbere.

Biteganyijwe ko TPIR izarangiza imirimo yayo ku mugaragaro igihe izaba imaze gusoma urubanza rwa nyuma mu Rugereko rw’Ubujurire. Mu gihe TPIR igitegereje isomwa ry’uru rubanza mu mwaka wa 2015, ntizahwema kurwanya umuco wo kudahana ku bantu bose bakekwaho ibikorwa bya jenoside  yibanda ku guca imanza, kumenyekanisha ibyo ikora no kwiyongerera ubushobozi. Ibi bikorwa bizafasha TPIR kurangiza inshingano zayo zo guha ubutabera abakorewe jenoside kandi TPIR ikaba yizera ko bizaca intege abandi bantu baba bafite umugambi wo gukora amarorerwa nk’aya mu gihe kizaza.

IBINTU BY’INGENZI BYARANZE AMATEKA YA TPIR

Ku itariki ya 8 Ugushyingo 1994 – Umuryango w’Abibumbye washyizeho TPIR

Inama Ishinzwe Amahoro ku Isi, imaze kubona uko ibintu byari byifashe nyuma ya jenoside kandi ishingiye kuri za raporo zerekeranye n’ "ibikorwa binyuranyije ku buryo bukomeye n’Amategeko mpuzamahanga arengera abantu mu gihe cy’intambara byakorewe mu Rwanda" yiyemeje "guhagarika ikorwa ry’ibyo byaha no gufata ingamba zihamye kugira ngo ababikoze bashyikirizwe ubucamanza."

Ni muri urwo rwego Urukiko Mpanabyaha Mpuzamahanga Rwashyiriweho u Rwanda (TPIR cyangwa Urukiko) rwashyizweho maze icyicaro cyarwo gishyirwa Arusha muri Tanzaniya.

• Icyemezo 955 (1994) gishyiraho TPIR
• Icyemezo 977 (1995) gishyira icyicaro Arusha

Ku itariki ya 26 Gicurasi 1996 – Gereza ya mbere y’Umuryango w’Abibumbye

Hafunguwe Gereza y’Umuryango w’Abibumbye iri Arusha (UNDF), ari na yo ya mbere yubatswe n’uyu Muryango. Kugeza ubu, iyi gereza imaze kwakira abaregwa barenga 80 kandi yacumbikiye imfungwa za TPIR zahamagawe nk’abatangabuhamya, n’izindi zafunzwe n’inkiko, zirimo n’izo mu Rwanda. Iyi gereza yahuguye kandi abakozi b’Umuryango w’Abibumbye bashinzwe umutekano, abayobozi b’amagereza yo mu bihugu imanza zaciwe n’Urukiko zirangirizwamo ndetse n’abacungagereza barenga 550 bo muri Tanzaniya ku byerekeranye n’amahame mpuzamahanga ngenderwaho arebana n’ifungwa.

Ku itariki ya 9 Mutarama 1997 – Iburanisha rya mbere mu rubanza rwa jenoside

Urubanza rwa Jean-Paul Akayesu rwatangiye kuburanishwa. Ku itariki ya 2 Nzeri 1998, Urugereko rwa Mbere rw’Iremezo rwahamije Akayesu, wahoze ari Burugumesitiri wa Komini ya Taba, icyaha cya jenoside. Muri uru rubanza, TPIR yabaye urukiko mpuzamahanga rwa mbere ruhamije uregwa icyaha cya jenoside rukaba kandi n’urwa mbere rwagaragaje uko abantu bagomba kumva igisobanuro cya jenoside gikubiye mu Masezerano Mpuzamahanga y’i Jeneve yo mu mwaka wa 1948. Muri urwo rubanza ni ho TPIR yasobanuye bwa mbere icyaha cyo gusambanya ku gahato mu mategeko mpanabyaha mpuzamahanga kandi ni bwo yemeye ko gusambanya ku gahato ari bumwe mu buryo bwo gukora jenoside.

Muri Nyakanga 1997 – Ishyirwaho ry’Agashami gashinzwe ibibazo bijyanye n’uburinganire bw’ibitsina no gufasha abakorewe icyaha cya jenoside

Iyi gahunda yaje kongererwa imbaraga na Porogaramu ishinzwe kwita ku batangabuhamya n’abashobora kuba bo yatangijwe ku itariki ya 26 Nzeri 2000. Kuba izi gahunda zombi zikomeje gukorana n’abaturage bigaragaza ko TPIR yiyemeje kwita no gufasha abakorewe icyaha cya jenoside.

Ku itariki ya 18 Nyakanga 1997 – Ifatwa ry’abantu barindwi bakekwagaho icyaha cya jenoside, i Nairobi

Abantu barindwi bakekwagaho icyaha cya jenoside, barimo uwahoze ari Ministiri w’Intebe wa Guverinoma y’Agateganyo, bafatiwe i Nairobi muri Kenya mu gikorwa cyiswe Operation NAKI (Nairobi-Kigali). Iki gikorwa cyerekana uruhare rukomeye abategetsi b’ibihugu bagize mu gushyikiriza ubucamanza abakekwaho icyaha cya jenoside n’ibindi bikorwa bihungabanya ku buryo bukomeye uburenganzira bwa muntu. Ibikorwa byakurikiyeho byo gushakisha abakekwaho ibi byaha byatumye abantu 83 batabwa muri yombi. Abantu batatu ni bo bonyine batarafatwa kugeza muri uku kwezi kwa Mata 2014, bakaba bazaburanishwa na Urwego Mpuzamahanga rwashyiriweho kurangiza imirimo y’Inkiko Mpanabyaha Mpuzamahanga [MICT]. Amadosiye y’abandi bantu batandatu batarafatwa yimuriwe mu Rwanda kugira ngo ruzababuranishe.

Ku itariki ya 1 Gicurasi 1998 – Umuntu wa mbere yemeye icyaha cya jenoside

Uwahoze ari Ministiri w’Intebe wa Guverinoma y’Agateganyo Jean Kambanda yemeye icyaha cya jenoside. Bwari ubwa mbere uregwa yemera ko yagize uruhare mu cyaha cya jenoside, mu cy’ubwumvikane bugamije gukora jenoside no mu byaha byibasiye inyokomuntu. Ubwo TPIR yemeraga kwakira ubwemeracyaha bwa Jean Kambanda ku itariki ya 4 Nzeri 1998, yabaye urukiko mpuzamahanga rwa mbere nyuma y’urw’i Nuremberg rwaciriye urubanza uwahoze ari Umukuru wa Guverinoma.

Ku itariki ya 12 Gashyantare 1999 – Mali yabaye igihugu cya mbere cyashyize umukono ku masezerano yerekeranye n’irangizwa ry’ibihano bitangwa na TPIR

Nyuma y’aya masezerano, andi masezerano yashyizweho umukono na Bene [Benin], u Bufaransa, u Butaliyani, u Rwanda, Senegali, Swazilandi na Suwede. Aya masezerano agaragaza uruhare rukomeye abategetsi b’ibihugu bafite mu gutuma abahamwe n’ibikorwa binyuranyije ku buryo bukomeye n’amategeko mpuzamahanga barangiza ibihano bahawe hakurikijwe amahame mpuzamahanga ngenderwaho arebana n’ifungwa.

Ku itariki ya 25 Nzeri 2000 – TPIR yafunguye Ikigo gishinzwe gutanga amakuru i Kigali

Ikigo cya TPIR gishinzwe gutanga amakuru n’inyandiko zirebana n’imirimo yayo cyiswe Umusanzu mu Bwiyunge cyatangijwe i Kigali. Izina ry’ikigo "Umusanzu mu Bwiyunge" risobanura "Contribution to Reconciliation" mu Cyongereza. Gifite ahantu hatangirwa amakuru, kikagira isomero na Porogaramu yo gufasha abakorewe ibyaha. Ikigo Umusanzu ni igikorwa cy’ibanze mu bikorwa binyuranye TPIR ikorera mu Rwanda no mu karere bigamije kumenyekanisha ibyo ikora.

Ku itariki ya 23 Ukwakira 2000 – Itangira ry’ "Urubanza rwitiriwe itangazamakuru"

Mu rubanza rwa Jean Bosco Barayagwiza, Ferdinand Nahimana na Hassan Ngeze ni bwo bwa mbere urukiko mpuzamahanga rwahamije abanyamakuru icyaha cyo gutangaza amakuru agamije gushishikariza abaturage gukora ibikorwa bya jenoside. Muri uru rubanza, Urugereko rw’Ubujurire rwemeje ko ihame mu mategeko ryekeranye n’uburyozwacyaha bw’umuntu ukuriye abandi rikoreshwa no ku basiviri bari mu myanya y’ubuyobozi.

Ku itariki ya 28 Kanama 2003 – Gahunda yo kurangiza imirimo y’Urukiko

Inama y’Umuryango w’Abibumbye Ishinzwe Amahoro ku Isi yafashe Icyemezo 1503, gitegeka TPIR gushyiraho gahunda yo kurangiza imirimo yayo. Ubu TPIR irateganya kuba yarangije guca imanza zose zigisuzumwa mu bujurire bitarenze itariki ya 31 Ukuboza 2014, uretse urubanza rumwe ruzaba rugikomeza. Biteganyijwe ko urubanza rwa nyuma rwa TPIR mu bujurire ruregwamo Nyiramasuhuko na bagenzi be (rwitiriwe "Butare") ruzasomwa mu mwaka wa 2015.

Ku itariki ya 16 Kamena 2006 – Jenoside itagibwaho impaka

Ku nshuro ya mbere, Urugereko rw’Ubujurire rwa TPIR rwemeje ko ubwicanyi bwakorewe Abatutsi mu Rwanda mu mwaka wa 1994 ari jenoside kandi ko iri ari ihame ababuranyi batagomba kujyaho impaka. Bityo rero, kuba Jenoside yarabaye byemejwe ku buryo budasubirwaho.

Ku itariki ya 24 Kamena 2011 – Umugore wa mbere yakurikiranweho icyaha cyo gusambanya ku gahato nk’icyaha cyibasiye inyokomuntu

Pauline Nyiramasuhuko ni we mugore wa mbere wakorewe Inyandiko y’ibirego n’urukiko mpanabyaha mpuzamahanga maze rumuta muri yombi. Nyuma yo kuburanishwa mu Rugereko rwa Mbere rw’Iremezo, yabaye umugore wa mbere wahamijwe icyaha cya jenoside, icy’ubwumvikane bwo gukora jenoside, n’icyo gusambanya ku gahato nk’icyaha cyibasiye inyokomuntu.

Icyitonderwa: Kugeza muri uku kwezi kwa Mata 2014, uru rubanza ruracyaburanishwa n’Urugereko rw’Ubujurire.

Ku itariki ya 23 Gicurasi 2011 – Urukiko rwatangiye kwakira ibimenyetso kugira ngo bizakoreshwe mu manza zizaba nyuma

TPIR yatangiye kwakira ubuhamya budasanzwe mu rubanza rwa Félicien Kabuga (reba ifoto) kugira ngo bushyingurwe maze buzakoreshwe mu rubanza amaze gufatwa. Nyuma yaho, ubundi buhamya nk’ubwo bwatanzwe mu manza z’abandi bantu 2 batarafatwa ari bo: Augustin Bizimana na Protais Mpiranya. Icyo Urukiko rugamije mu kwakira ubu buhamya ni ukugira ngo igihe kigenda gishira kitazatuma umuryango mpuzamahanga unanirwa kubaburanisha igihe bazaba bafashwe.

Ku itariki ya 18 Ukuboza 2011 – Urubanza rwa mbere rwimuriwe mu Rwanda

Urugereko rw’Ubujurire rwa TPIR rwahamishijesho icyemezo cya mbere cyo kwimurira mu Rwanda inyandiko y’ibirego ya Jean-Bosco Uwinkindi uregwa ibyaha mpuzamahanga kugira ngo rumuburanishe. TPIR imaze kwimurira mu Rwanda imanza umunani. TPIR yimuriye mu Bufaransa izindi manza ebyiri kugira ngo zihaburanishirizwe. Ubu MICT irimo gukurikirana imigendekere y’imanza zose zimuriwe mu bihugu.

Ku itariki ya 2 Gashyantare 2012 – Abanyapolitiki bo mu ishyaka rya MRND baryojwe ibyaha byakozwe n’urubyiruko rw’iryo shyaka

Abayobozi bakuru b’Ishyaka rya MRND (Muvoma Iharanira Repubulika, Demokarasi n’Amajyambere ya Rubanda) mu Rwanda baryojwe ibikorwa byo gusambanya ku gahato n’ibikorwa by’urugomo rushingiye ku gitsina byakozwe n’urubyiruko rw’ishyaka ryabo rwitwaga Interahamwe, mu rubanza rwa Ėdouard Karemera na Matthieu Ngirumpatse.

Icyitonderwa: Kugeza muri uku kwezi kwa Mata 2014, uru rubanza ruracyaburanishwa n’Urugereko rw’Ubujurire.

Ku itariki ya 1 Nyakanga 2012 – MICT yatangiye imirimo yayo

Urwego Mpuzamahanga rwashyiriweho kurangiza imirimo y’Inkiko Mpanabyaha Mpuzamahanga rwafunguye ishami ryarwo (MICT cyangwa Urwego) Arusha ku mugaragaro umwaka umwe mbere y’uko ishami ryarwo rya kabiri rifungura imiryango i Lahe [La Haye] mu Buholandi ku itariki ya 1 Nyakanga 2013. Hakurikijwe Icyemezo 1966 (2010), MICT ifite inshingano yo gukomeza imirimo ya TPIR n’iy’Urukiko Mpanabyaha Mpuzamahanga Rwashyiriweho Icyahoze cyitwa Yugosilaviya.

Ku itariki ya 20 Ukuboza 2012 – TPIR yasomye urubanza rwa nyuma mu Rugereko rwa Mbere rw’Iremezo

Urubanza rwa Augustin Ngirabatware ni rwo rwa nyuma rwasomwe n’Urugereko rwa Mbere rw’Iremezo rwa TPIR. Ubujurire bwatanzwe n’Ubwunganizi muri uru rubanza buracyasuzumwa n’Urugereko rw’Ubujurire rwa MICT.

Ku itariki ya 9 Nzeri 2013 – Ibiro bya Porokireri byahawe igihembo cyo kuba byarabaye indashyikirwa mu mirimo yabyo

Ihuriro mpuzamahanga ry’Abaporokireri ryahaye Ibiro bya Porokireri wa TPIR igihembo cyo kuba byarabaye indashyikirwa mu mirimo yabyo. Ubu bwari uburyo bwo gushimira ibi biro kubera uruhare byagize mu "kurwanya umuco wo kudahana abakoze ibyaha by’indengakamere no kuba byarafashe iya mbere mu gushyira ahagaragara Igitabo gikubiyemo ibintu ngenderwaho" Abaporokireri mpuzamahanga n’ab’ibihugu bazajya bifashisha mu mirimo yabo. Muri Kanama muri uwo mwaka, Ibiro bya Porokireri byanashyize ahagaragara Igitabo gikubiyemo amasomo yavuye mu byo Urukiko rwakoze byerekeranye no gushakisha no guta muri yombi abakurikiranwe batarafatwa, Muri Mutarama 2014, ibi Biro byashyize kandi ahagaragara ikindi gitabo cyiswe "Igitabo gikubiyemo ibintu ngenderwaho mu gukurikirana ibikorwa by’urugomo rushingiye ku gitsina mu turere tuvuye mu ntambara".

IMIRIMO ISIGAYE

Nyuma y’imyaka 20 habaye amwe mu mahano akomeye yagwiririye ikiremwamuntu mu bihe bya vuba isi irebera, TPIR ikomeje kwibanda ku mirimo yo kurangiza inshingano zayo zo guha ubutabera abantu batabarika bakorewe jenoside.

TPIR yateye intambwe igaragara mu kurangiza inshingano yahawe hakurikijwe Ibyemezo by’Inama Ishinzwe Amahoro ku Isi. Urubanza rwa nyuma mu Rugereko rwa Mbere rw’Iremezo, ari rwo rwa Ngirabatware, rwaciwe ku itariki ya 20 Ukuboza 2012. Ubu Urukiko rurashyira imbaraga nyinshi mu kurangiza guca imanza ziri mu Rugereko rw’Ubujurire no gushyira mu nyandiko amasomo y’ingirakamaro yavuye mu mirimo yarwo igamije guca umuco wo kudahana.

Ku itariki ya 1 Nyakanga 2012, Urukiko rwatangiye kwimurira imwe mu mirimo yarwo mu rwego rwarusimbuye rwiswe Urwego Mpuzamahanga rwashyiriweho kurangiza imirimo y’Inkiko Mpanabyaha Mpuzamahanga (Urwego cyangwa MICT). Urwego rufite inshingano yo gukora ku buryo imirimo y’ingenzi, irimo gushakisha no gukurikirana abatarafatwa, kimwe no kurinda no gufasha abakorewe ibyaha hamwe n’abatangabuhamya batanze ubuhamya mu rukiko, ikomeza nta nkomyi.

Imanza zikiburanishwa

Muri uku kwezi kwa Mata 2014, mu Rukiko hasigaye imanza eshanu zikiburanishwa zikubiyemo ubujurire 17 bwatanzwe na Porokireri ndetse n’Ubwunganizi bajuririra imanza zaciwe n’Urugereko rwa Mbere rw’Iremezo zirimo abantu 11. Hari urundi rubanza rw’umuntu umwe rwaciwe n’Urugereko rwa Mbere rw’Iremezo rwa TPIR rwajuririwe mu Rwego kandi rutaracibwa.

Kwimurira imirimo isigaye muri MICT

Ku itariki ya 22 Ukuboza 2010, Inama y’Umuryango w’Abibumbye Ishinzwe Amahoro ku Isi yashyizeho Urwego ngo rukomeze imirimo ya ngombwa izaba itarakorwa na TPIR n’Urukiko Mpanabyaha Mpuzamahanga Rwashyiriweho Icyahoze cyitwa Yugosilaviya (TPIY). Ishami ry’Urwego riri Arusha ryatangiye imirimo yaryo ku itariki ya 1 Nyakanga 2012.

Gushakisha  no gukurikirana abantu 3 batarafatwa baregwa jenoside n’ibyaha byibasiye inyokomuntu biri ku mwanya w’ibanze muri gahunda zihutirwa z’Urwego. Urwego kandi ubu rurimo gusuzuma ubujurire mu rubanza rwa Ngirabatware, rukaba kandi ruzaburanisha imanza rwaramuka ruregewe, ruburanishe imanza bundi bushya, ruburanishe imanza zerekeranye no gusuzugura urukiko n’izerekeranye n’ubuhamya bw’ikinyoma, cyangwa izasabiwe gusubirwamo kubera ingingo nshya zaciwe burundu na TPIR, cyangwa izo rwaciye zasabirwa gusubirwamo.

Mu yindi mirimo y’ingenzi ya MICT harimo kurinda umutekano w’abatangabuhamya batanze ubuhamya mu Rukiko no kubitaho, kugenzura uko ibihano byatanzwe n’Urukiko birangizwa, gufasha inkiko z’ibihugu zikora iperereza cyangwa zikurikirana ibyaha bifitanye isano na jenoside. Indi nshingano ikomeye y’Urwego ni ugucunga ubushyinguranyandiko bw’Urukiko hagamijwe kubumbatira inyandiko nyinshi zerekeranye n’imanza ndetse n’ubuyobozi by’ Urukiko no gutuma rubanda bashobora kuzigeraho.

Imirimo irimo gukorwa irebana n’umurage w’Urukiko no kumenyekanisha ibyo rukora

Uru rubuga rwa interineti ni umushinga wa mbere Urukiko rutangiye mu mishinga myinshi ruzakora mu mwaka wa 2014 mu rwego rwo kwibuka jenoside ku nshuro ya 20 no mu rwego rw’isabukuru y’imyaka 20 TPIR imaze ishyizweho izizihizwa ku itariki ya 8 Ugushyingo 2014. TPIR imaze imyaka 20 irangaje imbere izindi nkiko mu kugira inararibonye yihariye mu butabera mpanabyaha mpuzamahanga ikaba kandi yarashoboye kugirana ubufatanye n’abayobozi b’u Rwanda ndetse n’abayobozi b’ibihugu byo mu karere k’Afurika k’ibiyaga bigari n’ab’ahandi ku isi mu guteza imbere amahame y’ubutabera mpuzamahanga  n’umuco wo kuryoza umuntu ibyo yakoze.  

Nk’uko raporo yo mu Ugushyingo 2013 yerekeranye na Gahunda yo kurangiza imirimo y’Urukiko ibigaragaza “amasomo yakuwe mu bufatanye mpuzamahanga hagati y’Urukiko n’ibihugu bigize Umuryango w’Abibumbye (…)  ni ryo shingiro ry’umurage w’Urukiko kuko guterana inkunga n’ubufatanye mpuzamahanga bizakomeza kugira uruhare runini mu miyoborere y’inkiko mpuzamahanga zose n’inkiko z’ibihugu ziburanisha ibyaha mpuzamahanga”.

Kumenyekanisha ibyo Urukiko rukora no kongera ubushobozi

Urukiko rukomeje gushyira mu bikorwa gahunda z’ingenzi zo kumenyekanisha ibyo rukora no kongera ubushobozi muri iki gihe rwitegura kurangiza imirimo yarwo. Mu bikorwa by’ingenzi by’iyi gahunda harimo gukwirakwiza amakuru, guhererekanya amakuru ku buryo burushijeho kuba bwiza no korohereza abantu kugera ku bukemuramanza bw’Urukiko no ku zindi nyandiko zerekeranye n’amategeko. Ibi bikorwa byo kumenyekanisha Urukiko hanze yarwo bikorerwa ahanini mu Kigo gishinzwe gutanga amakuru n’inyandiko zirebana n’imirimo y’Urukiko (Umusanzu) no mu bindi bigo 10 bishinzwe gutanga amakuru byakwirakwijwe mu ntara hirya no hino mu Rwanda. Abantu bagera ku bihumbi 65 ubu bamaze kwitabira ibi bigo bagamije kwifashisha inyandiko nyinshi zakusanyijwe n’Urukiko ku byerekeye jenoside, inyandiko zitanga amakuru ku Rukiko, inyandiko zakoreshwa mu mahugurwa, isomero no kureba amashusho ya videwo no gukoresha interineti.

TPIR ikomeje kandi guha amakuru abafatanyabikorwa bayo ku rwego rw’igihugu, urw’akarere no ku rwego mpuzamahanga ikoresha amamurika n’amahugurwa bigamije kumenyesha abantu ibyo ikora ndetse yanashyizeho umushinga munini ugamije gukangurira urubyiruko ibyo ikora.

Itsinda ry’Urukiko rishinzwe kumenyekanisha ibyo rukora rikomeje gushyira mu bikorwa hirya no hino mu Rwanda gahunda y’amahugurwa agamije gufasha abantu gusobanukirwa jenoside. Abantu bagera ku bihumbi 16 barimo abarimu, abanyeshuri n’abavuye ku rugerero bitabiriye aya mahugurwa.

Gahunda yo kongerera u Rwanda ubushobozi na yo irakomeje. Muri urwo rwego, mu mwaka wa 2012 TPIR yatangije umushinga wo gushyira mu Rwanda ibikoresho by’ikoranabuhanga ry’amajwi n’amashusho rituma abantu bavugana barebana kandi batari hamwe. TPIR ikomeje kandi guha Guverinoma y’u Rwanda n’abanyarwanda inkunga mu rwego rw’ikoranabuhanga n’amahugurwa muri iki gihe yitegura gusoza imirimo yayo.

IMISHINGA ITEGANYIJWE YEREKERANYE N’UMURAGE W’URUKIKO

• 4 April 2014 - ICTR to Host Ceremony in Commemoration of 20^th Anniversary of the 1994 Genocide in Rwanda

Kugira ngo amasomo akomeye yavuye mu byo Urukiko rwakoze mu myaka 20 ishize atibagirana, TPIR irateganya gutangiza imishinga inyuranye yerekeranye n’umurage wayo igamije kugaragaza uruhare rwayo mu guteza imbere amategeko mpuzamahanga ndetse no gufasha abantu gusobanukirwa neza ibintu by’ingenzi byagendeweho mu ikurikiranabyaha no mu miyoborere ya rumwe mu nkiko mpanabyaha mpuzamahanga za mbere zashyizweho nyuma  y’urw’i Nuremburg.

Mujye muhora mureba ahangaha ko hari ibyahindutse kuri gahunda zinyuranye zirimo gutegurwa:

• Urubuga rwa interineti rutanga amakuru yerekeranye n’ umurage w’Urukiko
• Inama ku mategeko mpanabyaha mpuzamahanga mu rwego rw’isabukuru y’imyaka 20 TPIR imaze ishyizweho
• Amahugurwa azakorwa n’Inkiko Mpuzamahanga ku bintu by’ingenzi bigomba gukurikizwa n’amasomo yavuye mu mirimo yazo
• Inama ya 7 ya ba Porokireri b’Inkiko Mpuzamahanga ku mategeko mpanabyaha mpuzamahanga
• Filimi yerekana ibyabaye
• Igitabo gikubiyemo ibintu bikurikizwa mu kwimurira imanza mpuzamahanga mu nkiko z’ibihugu
• Umushinga ugamije kwandika inkuru yerekeranye na jenoside

Niba wifuza kugira uruhare muri iyi mishinga cyangwa kuyitera inkunga, ohereza ubutumwa aha hakurikira: ictrlegacy@un.org